有眼不識舞獅．．

尋晚訓左十三個鐘，所以今日精神好．有時做呢行真係吃得咸魚要抵得渴，一時無覺好訓，一時一訓就十幾個鐘，Ｄ內臟都壞鬼晒．所以成日听到Ｄ藝人早死就係甘既原因咯．
呢排拍緊“談談情，舞舞獅”，一听就知道套戲係講舞獅架啦．未開拍之前我地幾位演員都要去學Ｄ舞獅，听落好似好專業甘，其實我地去學Ｄ基本功者，因為我地學果幾日專業得去邊呀？真正舞獅既人起碼學果十年八年．如果吾係拍呢套戲，我都吾係甘了解舞獅，相信好多人都係．所以細佬真係好佩服舞獅既呢班“后生仔”，無佢地既話，華人傳統既文化就吾會延續落去架啦．何為呢班后生仔呢？事關教我地既師傅都係得果二十二歲，佢學左八年，佢既正職係托車，平時佢著住拖鞋騎住佢架蛤仔又或者喳住佢架黐左好大個中文字響個車頭蓋度既國產車黎武館教我地舞獅，點解我要甘黎介紹呢位師傅仔呢？因為當你就甘睇佢，點都睇吾出佢可以舞獅舞得甘勁既．當你見到一班外貌好吾傳統既后生仔一齊做Ｄ甘富中國傳統文化既動作，個心真係有Ｄ感動．
可以有機會拍到呢套戲，真係內外都開心，內外？內﹣﹣係因為可以介紹舞獅比觀眾，令到大家睇響之余又有機會認識到舞獅人既生活．外﹣﹣事關呢套係一套喜劇，劇本已經好笑，現場拍既時候仲好笑，我拍過甘多部，都未試過笑到收吾到聲NG拍吾到既．希望大家會鐘意呢部“談談情，舞舞獅”啦，好似係明年農曆新年期間播，支持下啦．．．不過依家都要支持播緊既“還我情真”呀．．．